إحنا آسفين يا سينائي!

بقلم: الدكتور محمد أبوعمارة

مبدئياً عزيزي الطائر السينائي أنا والله ما بعرفك وما في بيني وبينك أي عداوه بالعكس أنا بحب الطيور والعصافير وبحارب كل شخص بيحاول يصيدهم، وفي مرّة رافقت زملائي لمنطقة وادي البطم في رحلة ولما وصلنا بدأ الشباب باستخدام  -الخراطيش- لاصطياد الطيور وعندما شاهدت ما اصطادوا وكانت عبارة عن عصافير مزركشة جميلة اللون فريدة النوع صدمت عند مشاهدتي للضحايا من العصافير والطيور الجميلة وقطعت علاقتي مع أصدقائي بعد أن صرخت بهم ووبختهم بشدة لقتلهم هذا الجمال الطبيعي ،وهذاك يوم وهذا يوم يا خوي يا سينائي والله ما حكيت معهم فأرجوك لا تفهمني غلط! بس بصراحة أنا ما بعرفك ولاعمري سمعت فيك، واللي ما بعرفك بيجهلك يا حبيبي بس أنا أول مرّة بعرف إنك الطائر الوطني للملكة الأردنية الهاشمية انا بعرف الكناري والدوري والصقر والعقاب والنسر وحتى بعرف الحمام الزاجل وحمام الكش وغيرهم بس السينائي والله العظيم وقسماً بالله إني عمري ما سمعت فيه! فما تزعل يخوي..

بس السؤال: هل لازم يتغير شكل العمله خلال كل فترة؟ يعني هل في قانون مثلاً كل عشر سنين لازم يتغير شكل العملة مثلاً، يعني على سبيل المثال "متى آخر مرّة تغير شكل الدولار؟! وأقصد بالشكل الصورة اللي عليه إذا كانت قد تغيرت أصلاً؟! وإذا كان هناك قوانين توجب بتغيير الشكل فمن الذي اختار الطائر السينائي لوضعه على عملة الدينار واستبداله بصورة الثورة العربية الكبرى! يعني هل مثلاً في قانون أو شروط للاختيار فما الذي جعل أصحاب القرار يختارون الطائر السينائي هل كان ذلك أسوة بدول أخرى ؟ أم أن اختيار هذا الطائر هي من شروط البنك الدولي مثلاً اتفاقية سيداو وغيرها! وبصراحة مين اللي خّلى هذا الطائر هو الطائر الرسمي للأردن وما تفهمني غلط يا خوي يا سينائي والله انت مش مقصود!

وهل التوقيت مناسب الآن لطرح هذه العملة مزينه بهذا الطائر الحميل ؟! والمشكلة لما بحثت عن الطائر السينائي لقيت في (google) مكتوب عنه  : (هو جزم سينائي من نوع الطيور من  فصيلة الشرشوريات) طلع الحمد لله من الشرشوريات والشرشوريات عيله راقية من عيل طيور عمان الغربية الراقية مش أي عيله..

المهم إحنا ما في بينا وبين الطير السينائي أي مشاكل بس مشاكلنا مع الحكومه اللي مش ملاقية إشي تشتغل فيه، يعني لسه موضوع المحروقات ومشاكل المحروقات وغلاء الأسعار وسوء التصريف لمياه الأمطار والواسطة والمحسوبية والهيئات اللي بتستنزف ميزانية الدولة  والتعيينات غير المسؤولة، والوزراء اللي رايحين جايين يعني وزير بفشل في وزارة معينة بنغيرله إياها وبنعطيه وزارة ثانية لانه يمكن يكون العيب في الوزارة مش في الوزير!!

يا خوي يا سينائي... سامحنا واستر ما شفت منا والله ما حدا بالشعب الأردني بيكرهك او بينه وبينك موقف وكل التعليقات اللي شفتها على مواقع التواصل مش انت المقصود فيها والله لا يسامح كل واحد بيلعب بمستقبل أبنائنا في الأردن الغالي والله ينتقم من كل شخص ما يحترم دم الشهداء اللي بتنزف كل يوم..

بكرر اعتذاري إلك ولكل فصائل الطيور وبحكي باسمي واسم كل الشعب 

إحنا آسفين يا سينائي؟